Yaralı döyüş yoldaşlarına kömək edən zaman şəhid olan Əzim Həsənovun qəhrəmanlığı – VİDEO

Müharibə başlayan kimi könüllü olaraq Bakıda xidmət etdiyi hərbi hissədən cəbhədə xidmətə yolanmaq istəyini bildirib.

Pressaz.az Xezerxeber.az-a istinadən xəbər verir ki, Mingəçevirdə yaşayan Ağdam sakini Əzim Həsənov Vətən müharibəsinin ilk günlərindən Füzuli və Cəbrayıl istiqamətində döyüşlərdə iştirak edib.

Komandiri atasına oğlunun bir neçə dəfə mühasirəyə düşən zaman özünü və əsgər yoldaşlarını xilas etdiyini bildirib. Amma sonuncu dəfə yaralı əsgəri qurtarmağa çalışan Əzim özü şəhid olub.

Bir qız, bir oğlan anası olan Şəhla Həsənova övladları ilə fəxr etdiyini deyir. Əzim hər zaman anasına tarixdə iz qoyan şəxs olacağını deyirmiş. Sonuncu dəfə danışan zaman anasına qələbə qazandıqlarını bildirib.

Vətən uğrunda canından keçən Əzim Həsənov kimi qəhrəman şəhidlərimizin ruhu şaddır. Çünkü onların qanı yerdə qalmadı, qələbə Azərbaycanın oldu.